In s’auditòrium Fraternità, Tortolì at festadu Sa Die de sa Sardigna: presentes istudiantes e autoridades tziviles.
Prenu de contenutos culturales, su mangianu, cun s’innu sardu interpretadu dae su Coro de Arbatax, sa riflessione subra su valore de su càntigu a tenore cun s’espertu Bastianu Pilosu e sa gara poètica intre Bruno Agus e Dionigi Bitzi acumpangiados dae su tenore de Cardedu. S’operadore Ivan Marongiu at presentadu is leturas in limba sarda de is pitzocos de s’Istitutu cumprensivu 1 e 2 de Tortolì ispiradas a is eventos de “Sa sarda rivolutzione”.
Ant atzapadu s’atentzione de su pùblicu in platea fintzas is interventos de sa retzitadora Clara Farina e de su presidente de s’Istitutu superiore regionale etnogràficu de Nùgoro, Stefano Lavra, e is launeddas de Alessandro Podda.
In abertura is saludos de su sìndigu de Tortolì, Marcello Ladu, e de su cunsigeri regionale Salvatore Corrias.
Est intervènnidu fintzas s’assessore regionale a su Turismu, Franco Cuccureddu.
Ufìtziu Limba Sarda Ogliastra 