Unu mangianu ispassiosu e de imparu in sa biblioteca comunale de Barì, acantu is piciocheddas e is piciocheddos de sa bidda ant imparadu su valore de s’agualidade e de sa diversidade.
Est istadu unu laboratòriu ispassiosu meda su de custu mangianu in sa biblioteca comunale de Barì, organizadu s’Ufìtziu Linguìsticu, gestidu dae sa sotziedade Suìa, e dae sa biblioteca “Berto Cara”.
S’eventu at printzipiadu cun su contu “Via de inoghe!”, traduidu in sardu dae is operadores linguìsticos Barbara Serrau e Alessandro Podda, e torradu a mutire “Foras de innoi”. S’istòria de is autores H. Meunier e N. Choux, est una narratzione ammajadora chi trasmitet a is giòvanos s’importu de s’agualidade e de sa diversidade, e chi indànimat is minores a non tìmere is diferèntzias, ca custas a s’ispissu podent èssere unu arrichimentu, afrontende cun sensibilidade su tema de s’ospitalidade de is istràngios in is comunidades nostras.
Posca, is piciocheddos ant pigadu parte a sa creatzione de sa carta de identidade, armados de colores, serros e cartontzinu, cun su sustennu pretziosu de is operadores linguìsticos e de sa bibliotecària Susanna Floreddu. Is pipios ant compiladu su documentu sighende is istrutziones, ponende is datos anagràficos issoro in limba sarda: nùmenes, sambenados, data de nàschida e àteros particulares.
Sa parte prus interessante est istada sa de su colore de is ogros in sardu, “nieddus”, “asulus”, “colore de cafè” e “colore de castàngia”, mentras sa prus ispassiosa est istada sa de is sinnos particulares, comente “bellu meda”, “geniosedda” e “simpàtica”. Gràtzias a una màchina fotogràfica istantànea de giogu, cada pipiu at pòdidu picigare sa fotografia sua in cada carta de identidade realizada durante su laboratòriu.
Ma s’ispantu prus mannu est lòmpidu a s’agabbu de sa faina, cando su sìndigu de su comunu de Barì, Ivan Mameli, est arribbadu a biblioteca. De acòrdiu cun is organizadores, at istròchidu una tzerimònia ufitziale de cunferimentu de sa tzitadinàntzia bariesa a is giòvanos partetzipantes. Su primu tzitadinu, bregiosu mannu pro sa presèntzia de medas pipios, ddos at mutidos unu a unu, at postu su timbru de sa biblioteca e firmadu “sa carta de identidadi sarda”, declarende·ddos in manera ufitziale “citadinus bariesus”.
Su laboratòriu faghet parte de is fainas de promotzione linguìstica de su progetu “Dae su de connotu a su benidore”, finantziadu cun fundos pro sa Tutela de is Limbas Sardas de sa Regione Autònoma de Sardigna, gestidu dae sa sotziedade Suia Snc de Ivan Marongiu e Alessandro Podda.
Ufìtziu Limba Sarda Ogliastra 