Tzia Anna Piras at pesadu una famìlia manna meda: noe fìgios (Silverio, Antonio, Carlo, Tito, Pietro, Marco, Rosa, Giorgio e Giuliano) a is cales si sunt agiuntos 11 nebodes e 5 nepodes segundos.
In sa vida s’est partzida intre domo e sartu, acantu agiudaiat in su traballu de su maridu, Giuseppe Deiana, massaju mortu in su 2004 a s’edade de 90 annos. Fèmina de fide, Anna Piras finas a bator annos a oe non mancaiat mai a sa missa de su domìnigu, posca a càusa de sa betzesa no est pòdida prus andare.
Comente testimòniant is istùdios de is ricercadores, in Ogliastra, unu de is chimbe logos de su mundu mutidos Zonas Bleu, (Blue Zone), paret chi ddoe siat una pertzentuale manna de tzentenàrios. In totu a oe si contant unas 40 persones chi a su presente podent bantare su primadu de àere barigadu su traguardu de is chent’annos. Immoe s’est agiunta peri tzia Anna Piras. Augùrios mannos e nche durare cantu bolet issa!
Custu su messàgiu de su sìndigu Ivan Mameli in facebook “Cun orgòlliu, seguru de interpretare su sentimentu de afetu de totu sa Comunidade Bariese e de s’Amministratzione Comunale, agatende·mi, pro impinnos istituizionali, foras de sa Sardigna, chi m’ant impedidu de ddu fàghere personalmente, afidu a custu messàgiu in Facebook sos prus caros augùrios de bonu cumpleannu a Tzia Anna Piras e a totu sa famìlia sua pro su traguardu bellu meda de sos 101 annos”.
Artìculu boddidu dae L’Unione Sarda: https://www.unionesarda.it/news-sardegna/ogliastra/nonna-anna-compie-101-anni-festa-a-bari-sardo-pxqd9dww
Ufìtziu Limba Sarda Ogliastra 