Carta de Montarbu: su documentu integrale

Carta de Montarbu – 2021. Concas a unu movimentu linguìsticu mannu e unitàriu

Sterrina.
Sa debbata aingíriu de su sardu est sighendi de unus cincuant’annus. In custus’annus eus bistu e
inténdiu parris de dónnia genia, oindí sa guarnissa de is leis est arrapresentada de sa lei 482 de su
stadu italianu e de sa lei 22 de sa RAS chi trabballant apari. Custa guarnissa est perou s’arrésumini
de una debbata internatzionali prus manna chi nosi at intrau in d-una simana noa. Eus lassau s’ultra
natzionalismu arrapresentau de is stadus natzioni de su ‘700 e imoi seus in s’arrexonamentu de
“minoria linguìstica”, chi no nosi praxit mancu po nudda, ma chi comentisisiat, arrapresentat
un’amelloramentu po is comunidadis che a sa sarda. S’amelloramentu, a dolu mannu, no at pirmítiu
perou a su sardu e, a àteras línguas che a sa nosta, de ddui porri lompi a sa própiu dinnidadi de sa
língua de su stadu, chi po nosus est s’italianu e seus in su tretu chi sa debbata etotu est sminguendi
fintzas a si spaciai dessudotu.
De sa Sardìnnia.
In su 1978 intrat a su Consillu Regionali una lei de initziativa populari asuba de su bilinguismu
perfetu. In su “Comitadu pro sa limba” Cicitu Màsala fiat su presidenti. Custa parti de is studiaus
sardus iat coberau 13.723 firmas, pinnicadas apari ande totu is comunus de sa Sardìnnia. In su 1978
su movimentu populari de is deretus linguìsticus de is sardus nci lompit fintzas a su cùcuru prus artu
de sa stória cosa sua. Tocat a nai chi Simon Mossa iat aténdiu puru a sa faina de unu Partidu Sardu
annoau e duncas de una polìtica sardista etotu annoada cun su faimentu de su stadudu de
indipendéntzia.
Mancai lómpiu a custu cùcuru su Comitadu no arrennescit a ndi scabbulli una bíncida de totu is
atropéllius chi ndi bessint a pillu de sa debbata asuba de sa lei in Consillu Regionali. Giuanni Lilliu chi

in cuddus annus fiat su presidi in sa facurtadi de Líteras de s’Universidadi de Casteddu, in d-
un’interbista iat nau “…innoi s’ intendit fragu de manetas…”. Custu sceti po cumprendi it’arratza de

avolutu si ndi fiat pesau. De cuddu cúcuru, oindí, seus torra a peis de monti.
De s’Europa moderna.
Chi imbucais a su giassu de ELEN s’assótziu europeu chi amparat is Línguas de Logu, o bosi ligeis
s’interbista a su segretàriu generali suu, bosi ndi acatais chi is Línguas de Logu in totu Europa funt
batallendi, a totu aguantai contras de s’assimiladura linguística, àstula bogada de custa sociedadi
neolibberista chi est faendidhi de mama e nosi bolit totus agualis . Chistionant e batallant, cun
manifestadas mannas, po is “scolas fitianas” (scuole immersive) e po sa “co-uficialidadi”. In
Sardínnia totu frimu est. De diora. Chi pigaus is primus líbburus asuba de “minorias linguísticas” in
Itàlia (custa espressada tocat a dha mudai cun “Línguas de Logu”) a su sardu no dd’arremonant giai
mai.
De sa Sardìnnia moderna
De su pagu chi eus scritu eus cumpréndiu chi su movimentu populari esistiat in Sardínnia. In Europa
esistit e batallat ancora. Sa crònaca si contat de is manifestadas aingíriu in is comunidadis de su Logu
europeas, abbitadas de millenas de militantis. Oindí in Sardínnia unu movimentu linguísticu, fartat?
S’arrespusta est ca EJA.

2

Ddoi at centenas, millenas de personis chi s’iant a bolli pinnicai apari in d-unu movimentu linguísticu
unitàriu, prurali, líbberu e chi impunnat a su primori in sa sociedadi sarda? Torra ca EJA.
Intzandus poita est chi no s’acrarit e, mescamenti, bosatrus chi seis ligendi custas arrigas, poita est
chi no ddu strantaxeus?
Nosus bieus dus barrancas prus mannus, chi depint mudai acoitu in dus impinnus. Su primu est ca
chini pigat a coru su sardu no oberit is sentidus a sa militàntzia personali e política. Chi ddu faiat
invecis mudàt totu e allestru puru. Su sigundu barrancu est ca, a nai sa biridadi, nisciunu partidu
políticu “mannu” presenti in Sardínnia ddu pigat a coru su sardu. No dd’at ancora amostau su Psd’Az
de dus annus e mesu a oi cun sa presidéntzia de Solinas, ma nimancu is àterus.
Arremonendi torra su primu puntu, s’impinnu podit essi craru e apretosu: donniunu bivat desei
s’amori suu po su sardu, a solu puru, che militàntzia individuali, personali e polìtica.
Arremonendi torra su sigundu puntu invecis, acetotu s’impinnu est craru, ma no est fàcili a fai:
apoderai sceti is fortzas políticas chi s’ant a pigai a coddu is fainas de fai aingíriu de sa língua sarda.
Un’arresúmini sériu, asseliau e chi faiat scentíficu, asuba de sa política linguística de bint’annus a oi,
chi eus averiguau puru chi no at funtzionau, no depit strobbai a su strantaxamentu lestru, de unu
movimentu linguísticu mannu, chi cuntzertit de política ma bivendidda de parti de aínturu, chena
de ndi sunfriri bessendindi tzeracu.
Ita si podit e si depit fai? Is puntus de sa Carta de Mont’Arbu

  • Arreconnosciaus s’apretu de unu movimentu linguísticu mannu incrusivu, prurali, chi
    s’arreconnoscat in su fai, chi bivat sa sociedadi e in sa sociedadi si sbodhichit;
  • A chini est in su movimentu linguísticu, e totu is chi trabballant a s’audeterminatzioni de sa
    Sardínnia depiant essi aínturu, studit su sardu;
  • Chistioneus su sardu, si fatzat una “mudadura de s’italianu”;
  • Fatzaus fainas de “militàntzia linguística” apariciadas comenti si spetat e abbitadas;
  • Chistioneus su sardu a is giòvunas e a is giòvunus;
  • Acabbusseus sa vida nosta in su sardu, in sa scola, in is logus de trabballu, in is média, in su spréviu.
    Oindí gi fait;
  • Sciobereus dónnia cuatru mesis una dí de s’atobiai “Sa dí de su Movimentu Linguísticu de su
    Sardu”, aundi fatzaus s’arresúmini de is fainas nostas e dónnia annu annoeus s’impunna de is fainas
    de custu comitau cunforma a is arresurtaus chi eus acurtu a callai.
    Oindí gi fait. Oindí teneus is leis, is amostus internatzionalis, stúdius scentíficus e unu niaxi de àteras
    ainas chi in su 1978 Cicitu Màsala e Giuanni Lilliu no teniant. Issus ant trabballau po arribbai a su
    “Comitadu” totus impari. Nosu, totus impari, depeus trabballai po su primori de su Movimentu
    Linguísticu e de is deretus de is sardus in sa sociedadi sarda, scientis de depi cumbati puru cun is
    sardus chi ancora no ant cumpréndiu s’importu de custa batalla. Nosi abetat una caminera longa e
    su tempus spacendi est, ma chi no dda pigaus imoi, custa caminera, no dd’eus a pigai mai prus.
    Assòtzius chi ant firmau sa “Carta de Montarbu”
    Babel Film Festival (ELEN)
    Bia – Bilinguismu in Aristanis
    CAMPOS – Associazione Coordinamento delle Arti Musicali e Poetiche di Tradizione Orale della
    Sardegna

3

Consulta de su sardu de Sardara
Lìngua Bia
Movidì
Sardware
Acadèmia de su sardu
Sìngulus
Annarosa Cardia, maista
Isabella Tore, maista
IMPORTANTI
Sa Carta de Montarbu est oberta a totus is chi funt diacòrdiu cun su chi eus scritu. Scriei a
infonlinguabia@gmail.com po ndi sciri de prus e po donai unu manu de agiudu.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s