Nuragigosu, unu biàgiu in su cumplessu archeològicu de Seleni

Si narat “Nuragigosu” su progetu de promotzione turìstica e culturale promòvidu dae s’Isportellu Linguìsticu Subracomunale de Elini cun s’agudu de s’assòtziu ogiastrinu Agugliastra e de sa sotziedade Suia. Su progetu previdit sa realizatzione de unos cantos filmados in limba sarda e inglesa dedicados a is sitos archeològicos prus importantes de s’Ogiastra, comente Seleni de Lanusè, Scerì de Irbono e Ruinas de Àrthana. In custas dies est essidu su primu vìdeu in sardu e in italianu intregadu a su cumplessu archeològicu de Seleni, a tìtulu “Nuragigosu, unu viàgiu in Seleni”. A ghiare is bisitadores virtuales at a èssere sa boghe de Andrea Marongiu de Irbono (7 annos), pro su vìdeu in sardu, e cussa de Sasha Gorshteyn. Is fotos e is ripresas sunt de Giorgio Altieri, montàgiu de Diego Piras e is testos de Ivan Marongiu e Alessandro Podda.

Salude pitzocheddas, salude pitzocheddos

Deo so Andrea e  bos apa a fàghere connòschere unu logu istravanadu, ispantosu, antzis nuragigosu!

Non nche cretides? Tando ponide fatu a mie!

Bos apa a allegare de su cumplessu archeològicu de Seleni, chi est a casi 1000 metros de artia, a suta de Monte Trìcoli. Custu logu est abitadu de 3500 annos…  E no, non faghet a ddos contare cun is didos de sa manu.

S’agatat in sartu de Lanusè, a ses chilòmetros dae sa tzitade, in mesu a unu padente de èlighes. Seis biende? Est nuragigosu!

Su situ est formadu dae su nuraghe Gennacili, inghiriadu dae muros de difesa, e dae unu bidditzolu nuràgicu chi in s’antigu teniat a mancu  200 pinnetas. Giai fiant duas! 

Si pensat chi sa biddighedda esseret abitada a cumentzare dae su 1500 prima de Cristu.

Gràtzias a sa positzione sua e a su clima bellu, su logu est istadu abitadu pro 1000 annos e posca  abbandonadu, peri si is pastores ant sighidu a ddu impreare pro medas annos.

Ma no est totu: a pagu tretu dae su nuraghe agatamus peri 2 tumbas de Gigantes chi forsis fiant 3, ma 1 no ddoe est prus.

Su nuraghe est istadu fatu in pitzu de una predàile manna chi a una parta imbusciada dae unu muru chi fiat formadu dae 10 filas de contones… Seis biede∙ddos? Chissai comente ant fatu is  sardos de tando a ampulare cussas predas grais! Est una cosa e non crèere, antzis est una cosa nuragigosa!

De su nuraghe abarrat su basamentu ebbia, ma si pensat ca fiat a turre sola che a su de Scerì de Irbono. Su monumentu est istadu impreadu pro medas tempus,  durante sa gosi mutida edade de su brunzu.  A sa parte arta s’arribbat  pighende in un’iscala istrinta cun 19 iscaleris. Sa segunda iscalita e forsis peri sa tertza chi serbiant pro lòmpere a is àteros aposentos, fiant acostiadas a sa muradura esterna.

Is primos a allegare de custu logu ispantosu a beru, sunt istados su cartògrafu Alberto Della Marmora in sa metade de s’800, s’archeòlogu Giovanni Spano. Ma su prus famadu de totus est su Generale Angelino Usai, un’istudiosu de Lanusè mortu in su 1985 chi ddi praghiat meda meda s’archeologia. Sa primu bia chi at bidu custu logu ischides ite at naradu? Est nuragigosu!

A pustis de tando is archeologos ant fatu campagnas de tzensimentu e de iscavu acanta sunt istados agatados una surra de repertos de èpocas diferentes. S’ogetu prus interessante est su bruntzetu mutidu “Fèmina tzerimoniante” chi si podet ammirare in su Museu Archeològicu Natzionale de Casteddu.

A costadu de su nuraghe ddoe sunt is restos duas pinnetas: pinneta 3 e pinneta 1. In sa n. 3 est istadu agatadu un’istèrgiu in pedra de mola, o bacile,  chi fiat postu in mesu a  un’aposenteddu cun a giru unu setzidòrgiu semper in pedra acanta is sardos nuràgicos faghiant ritos acapiados a su cultu de s’abba.

In s’àtera pinneta imbetzes, sa n. 1, sunt istados agatados bucones de brocas, vasos, giros e ànforas de èpocas e logos diversos. Custu nos faghet cumprèndere comente su situ de Seleni est unu logu importante pro is iscàmbios cummertziales de su Mediterràneu. Nuragigosu beru?

Semus casi lòmpidos a s’acabbu de custa bisita a su cumplessu nuràgicu de Seleni, ma prima de finire bos bògio fàghere bìdere is duas tumbas de Gigantes mutidas Seleni I e Seleni II. Tenent custu nùmene pro ite su pòpulu creiat chi ddoe biviat òmines mannos mannos, ma imbetzes fiant sepulturas colletivas, est a nàrrere chi beniant impreadas pro  interrare mortos medas. Sa forma s’assimbigiait a cussa de unu boe de is mamas. Sa parte tzentrale, acantu beniat postos is mortos, subenit sa conca de custu animale, e is duos bratzos laterales a mesuluna is corros suos. Castiadeddas bidas dae s’artu.  Nuragigosu, beru?

Is duas tumbas tenent diferèntzia de unu sèculu: Seleni I, sa prus pitica e sa prus antiga  est de su sèculu XV. Sa tumba de Seleni II, sa prus manna, est de su sèculu XIII.

In is iscavos is archeòlogos ant agatadu tres pedras traballadas, sa prus manna portat tres istampos in mesu e si pensat chi fiat posta in pitzu de su portale de intrada de sa tumba, acanta beniant postos tres bètiles minores, sìmbolos de fecundidade. In custu ambiente si faghiat su ritu de s’incubatzione: is latinos naraiant chi is sardos dormiant a costadu is tumbas pro abarrare a presu de is parentes mortos cun s’idea de ddos pòdere obiare in su sonnu. Oddeu,mi benit su titifrios solu a ddoe pensare!

Tando, cun custu su biàgiu nostru a Seleni est acabbadu. Ite nde pensades, bos est pràghidu? Ispero chi eja! Gràtzias piciocheddos e piciocheddas pro m’àere fatu cumpangia. A nos torrare a bìere pro un’àteru a un’àtera bìsita e a un’àteru biàgiu nuragigosu!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s