Regordende a don Vinante, su prèide gherreri

10252107_10203722286887990_5036937595807112236_nCussa die de mesu arbile de su 2012 in Elini ddoe fiant totus, ma totus a beru. Ddoe fiat su Munsennore Antioco Piseddu, chi aiat tzelebradu sa missa de mortu, una trintina de religiosos e prèides de is biddas a inghìriu, is autoridades comunales e regionales, e poi sa gente: parrochianos, fideles, amigos, connoschentes e meda giòvanos. E pròpiu is giòvanos nche ant portadu su baullu a pala finas a campusantu. Sa gente in sa crèsia de Santu Gavinu non ddoe capiat e peri is tres pratzigheddas de Elini fiant prenas a isticu. Totus unidos dae su dispraghere e dae sa consapevolesa ca comente a issu non nche diat àere tentu nisciunu àteru, cun sa bonesa sua e cun s’arrebbechìmine suo.
A coro modde e abertu a su cumpromissu a s’ocurrèntzia, ma cando tocaiat fiat forte che sa roca e tostorrudu comente cando aiat collocadu cussa rughe in punta de Gennargentu pro more chi totus is sardos dda diant àere pòdida bìdere, e incue puru aiat fatu su diàulu a cuàteru.

Oe puru totus si subenint de Don Vinante, totus s’ammentant is ogros de su curadu tridentinu prestadu a s’Ogiastra chi pro prus 50 annos at a divènnere domo sua. Ogros isprugu de s’ànima. Un’ànima firma, curreta, inchieta cando serbiat, ma serena pro ite sustènnida dae una fide  segura e forte. Un’ànima povera, in ue sa poberesa tenet sa forma de su lugore, de sa semplitzidade. Pòberu cun is pòberos, a 36 annos, dae sa Val di Fiemme fiat lòmpidu prima a Lanusè in su 1958, nominadu dae Monsignor Lorenzo Basoli, poi a Biddanoa, dae su 1960 a su 1984, e in fines a Elini finas a su 2012, semper cun su pròpiu ispìritu dae missionàriu, resolutu, rigorosu, cònchinu, coerente e agudu.

Nàschidu in Tesero in Val di Fiemme s’8 de ghennàrgiu de su 1922, Don Pietro Vinante fiat totu custu, ma non custu ebbia. Ogna prèide, bene o male, lassat un’ammentu in sa bidda chi ddi benit afidada, ma don Vinante, sena duda, in cussas duas biddas at lassadu un’arrastu profundu chi at a abbarrare pro semper.
Cando fiat in Biddanoa, dae òmine de monte comente fiat issu, ddi praghiat su clima, s’àera frisca e is iscampinadas fatu de is serras de su Gennargertu. Si fiat afetzionadu a sa gente, ma cando depiat nàrrere calicuna cosa non si dda poderaiat in buca, dda iscuarteraiat e bostu. A is essias chi faghiat a su monte partetzipainat giòvanos e betzos, òmines e fèminas, e a totus aiant imparadu a isciare.
Connoschiat su tempus e ddi bastaiat a pompiare is àeras pro comprèndere si depiat niare. “Marcat nie- naraiat – abrontade totu s’ecuipagiamentu ca cras andamus a isciare”. E niaiat a beru! Sa die in fatu ddu bidiant isciende cun s’àbidu de prèide fatu de is caminos de sa bidda mancari èsseret mesunote.
don-vinante-sul-gennargentu.jpegCun sa bussa niedda sua fiat capassu de andare peri a s’àtera banda de su mundu, e in ogna logu s’agataret allegaiat de Deus, pregaiat e faghiat pregare: in màchina cun calicunu chi dd’aiat donadu unu passàgiu, in is coiles cun is pastores, in is bar cando sa gente fiat bufende nde faghiat pesare a totus a camba e guais a chie no ubbidiat! In Biddanoa aiat cuncordadu una cooperativa, una maglieria acanta pro paritzos annos ddoe aiant traballadu peri is fèminas de sa bidda chi beniant pagadas, ma su prus de is bias beniant invitadas a pensare a is bisongiòsos e a is Missiones in Àfrica. E durante sa giorronada, non mancaiat mai sa bisita a Gesu Sacramentadu!
Organizaiat loteria e torneos isportivos, imparaiat a cantare is giòvanos e poniat mùsicas bellas a totu volume chi s’intendiant in totu sa bidda e rintronaiant in is bavos e in is serras a inghìriu. Cando abrontaiant sa festa de Santu Basili s’arrenegaiat meda cun chie si ddi poniat in mesu e ddi faghiat andare male is progetos chi teniat in conca. S’interessaiat de totu; de mecànica, de fotografia, de micròfonos, de bandieras, de is àbidos, de libros, de isci, de currispundèntzia.
argento-vivo-la-leggenda-di-don-pietro-vinant-L-4NMnuB.jpegDon Vinante at bìvidu in poberesa, ma at arricadu totus cun sa fide manna sua e cun una vida de preghiera, conduida comente pastore de ànimas, maistru e educadore, e is prègios suos faghent iscarèschere peri calicunu difeteddu chi teniat.
Sa festa de Santu Basili ddu impinnaiat finas a s’isfinimentu. in cussa dies non papaiat nudda, si manteniat cun unu pagu de the. Pro Paschighedda fiat dovere a cuncordare su presèpiu chi deviat èssere fatu a òpera de arte e depiat abbarrare fatu finas a carèsima.
Si nche calaiat a Casteddu a passàgios, a bias faghende pigare un’assustru lègiu a is automobilistas chi si dd’agataiant in mesu caminu e bollerent o non bollerent si depiant firmare. Comente setziat in màchina cumentzait cun is pregadorias istringhende su Rosàriu chi nons’iscareschiat mai.
Don-Pietro-Vinante-300x208.jpgNon s’arrendiat mai don Vinante, comente in su 1975 aiat fatu pònnere cun s’agiudu de unu “CH” un’elicòtero de s’aereonàutica una rughe votiva a 1.834 metros de artia, in su cùcuru prus artu de sa Sardigna, punta La Marmora. Una temporada mala nde dd’ait betada e issu cun nche fiat resèssidu cun s’agiudu de una pariga de voluntàrios a nde fòghere un’àtera, ma però tocaiat a nche dda torrare a bogare a punta de Gennargentu. Tando aiat pigadu de manu e aia iscritu a s’Ufìtziu de su Cumandu de su Polìgunu Interfortzas de Chirra custa lìtera.

Elini, 06/08/1997

Spettabile Comando,
nell’estate del ’75, con l’ausilio di un “CH” che allora faceva settimanalmente la spola tra Viterbo e la base di Perdasdefogu, veniva issata a Punta La Marmora una Croce monumentale in memoria dei Caduti dell’Isola sui fronti di tutte le guerre.
Nell’inverno del ’78 un uragano di eccezionale veemenza la piegava e successive raffiche di Maestrale finivano per abbatterla. Quest’anno, con il generoso concorso di volontari, si è riusciti ad approntarne un’altra strutturata in modo da resistere alla veemenza delle bufere che d’inverno si abbattono su quella cima.
Come nel ’75, necessita ora la prestazione di un volo di elicottero che dal rifugio Bruncu Spina o dal salto di Desulo o dalla base antincendi di S. Cosimo possa trasportarla sul basamento predisposto a Punta La Marmora.
Si potrà poi procedere a suo tempo alla cerimonia di inaugurazione del Monumento alla presenza delle Autorità religiose, civili e militari. Urge per ora effettuare il trasporto della Croce sulla vetta prima che sopraggiungano le perturbazioni atmosferiche che si verificano lassù dopo Ferragosto.
Ci rivolgiamo pertanto a Codesto Comando per ottenere la prestazione di un elicottero dell’Esercito abilitato ad effettuare quel tipo di trasporto. Ai fini del ripristino del Monumento in oggetto, sacro alla memoria dei Caduti e sentito dal cuore della gente, questa vostra collaborazione è indispensabile.
Certi di trovare presso Codesto Comando sensibilità a questa iniziativa, rimaniamo in fiduciosa attesa di un positivo riscontro e porgiamo deferenti ossequi.

Sac. Don Pietro Vinante di Elini

Cando dd’aiant mandadu a Elini si fiat betadu ànima e coro pro agiudare sa gente e chie nde teniat bisòngiu. Ogna annu abrontaiat sa festa religiosa de sa Madonna de su Cramu e cun cussa carena sua istrìghile istrìghile, nche essiat a pee cun sa protzessione finas a is ùrtimos annos. Dae sa frecuèntzia de Radio Carmine, 101.500, divulgaiat su faeddu de Deus, ma tra una cantzone de crèsia e s’àtera afrontaiat peri temas de atualidade. Sa boghe sua, gràtzias a s’antenna de Punta Tricoli, lompiat in ogna ungrone ispèrdidu de sa Sardigna.
Semper in Elini aiat fatu asseliare sa crèsia e ddoe aiat postu su riscaldamentu impreende no isco e comente un’impiantu destinadu a Foghesu. Ancora, aiat fatu acontzare sa crèsia de su Cramu, proibende però is ballos pro ite fiat unu logu sagradu. Dae s’Intermare nd’aiat atzocadu portas de ferru e aiat cuncordadu unu campu de hockey pro is pitzocheddos.
Est istadu peri professore de religione a is mèdias de Irbono: comente imbucaiat in classe, a cosìngios de pedde, in deretura intonaiat a boghe manna Al chiaror del mattin, poi incumentzaiat sa letzione pretzèdia dae una preghiera longa e tzitatzione de Santu Giuanne Bosco e Santu Frantziscu de Sales.

Irina-Shayk-pubblicità-Intimissimi-primavera-2017.jpgTotus ddu connoschiant, a su mancu in Ogliastra ma aiant cumentzadu a ddu connòschere peri in totu sa Sardigna cando in su 2003 aiat fatu una crotziada contra a is cartellones pubblitzitàrios de fèminas iscundutas. Nd’aiaint allegadu totu is giornales: unu domìnigu a mangianu, primu chi is fideles de totu sa diòtzesi andarent in protzessione conca a Lanusè cun sa Madonna de s’Ogiastra in presèntzia de s’obispu, aiat tzensuradu a moda sua is manifestos in ue ddoe fiant fèminas ispogiadas imbusciende sinos e còschias cun un’iscrita ‘Ave Maria”. «Ho fatto un po’ di pulizia, portato un po’ di decenza nelle strade in cui doveva passare la madonna – aiat naradu cun s’atzentu suo su Nord – Troppi manifesti disdicevoli, troppa pubblicità balneare. Cosa può pensare un ragazzo quando tutti i giorni gli sbattono in faccia immagini del genere. È chiaro che si fa un’idea sbagliata vedendo il corpo umano adoperato per vendere della merce».

Ma a s’acabbu su coro de su gherreri de sa fide no at poderadu prus, ma teniat peri s’edadi sua. Su 5 de arbile de su 2012 fiat istadu ricoveradu in s’ispidale Nostra Sennora de sa Mecede de Lanusè pro un ictus in terapia intesiva. Su mangianu aiat tzelebradu cun àteros satzerdotes diotzesanos, in sa Catedrale de Lanusè, sa missa de su Crisma presiedida dae Mons. Antioco Piseddu.
Durante s’agonia no est abbarradu solu nudda: ogna die aiat reszidu s’afetu de familiares, de parrochianos, prèides de totu is diotzesis sardas e connoschentes. In facebook fiat nàschidu unu grupu mutidu “Una preghiera per don Vinante” acanta chie boliat podiat iscrìere una preghiera o pagos faeddos de istima pro cust’òmine valitòriu. Su calvàriu fiat cumentzadu sa die a in antis de Pasca Manna e fiat acabbadu su 15 de arbile.

Sa die de s’interru su Comunu de Elini aiat proclamdadu lutu tzitadinu. S’8 de cabudanni de su 2018 su Comunu de Biddanoa Strisàili dd’at intituladu unu caminu de sa bidda. In s’austu de su 2016 in Elini ddoe est istadu un’atopu pro contare aneddotos e contos a pitzu de custu prèide istimadu meda pro is ideas e pro sa coerèntzia sua. Unu comitadu de tzitadinos sustènnidu dae s’amministratzione comunale at propostu de aviare is pràticas pro sa beatificazione. In cuss’ocasione est istadu proietadu unu documentàriu in memòria sua, peri chi est impossìbile a si nde iscarèschere de issu, de Don Vinante, unu prèide a s’antiga, unu prèide beru.

foto Antonietta Olianas 2.jpg

Gràtzias meda a Tonina Olianas pro sa cuntzessione de is fotos de su grupu facebook ELINI….facce..colori…nostalgia…

Acàpios:
http://www.lanuovasardegna.it/nuoro/cronaca/2014/07/13/news/ricordo-di-don-vinante-dalla-val-di-fiemme-all-ogliastra-1.9592376
http://ilparadisononpuoattendere.blogspot.com/2012/04/dedicata-don-vinante-deceduto-ieri.html

http://www.ogliastraweb.it/don-pietro-vinante-il-prete-venuto-da-lontano/
ARGENTO VIVO LA LEGGENDA DI DON PIETRO VINANTE – 1997. Don Vinante scrive al Comando Militare Regione Sardegna per un CH dell’esercito
https://www.unionesarda.it/articolo/cronache_dalla_sardegna/2012/04/16/elini_si_spegne_la_voce_di_don_vinante_folla_ai_funerali_del_guer-6-267361.html
https://www.unionesarda.it/articolo/cronaca/2016/08/21/da_elini_la_proposta_la_chiesa_avvii_la_beatificazione_di_don_pie-68-526100.html

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s