At a èssere caraterizada dae su tema de is disìgios sa de trèighi editziones de “Tuttestorie”, fèstival de literadura pro pitzocos. Ant a èssere 430 is apuntamentos, tra atopos, laboratòrios, ispetàculos, performance, installatziones, narratziones e eventos ispetziales, destinados a pipios e pitzocheddos dae zero a 16 annos, prevìdidos in Casteddu dae su 4 a su 12 de mese de ladàmine, chi s’ant a articulare in su tzentru culturale Exma’ e posca fintzas in àteros 21 comunos de sa Sardigna. Tra is 95 istràngios chi ant a partetzipare a custa editzione ddoe ant èssere iscritores, artistas, narradores, atores, iscientziados, mùsitzistas e illustradores. Su programma riservadu a is iscolas, dae cussas de s’infàntzia finas a is segundàrias, previdet 266 atividades. Is iscritziones sunt giai medas a beru: 15 mìgia istudiantes ant giai pedidu de pòdere partetzipare. S’initziativa, pensada e promòvida dae sa libreria Tuttestorie, tenet comente a presidente onoràriu s’iscritore David Grossman e contat in sa collaboratzione de s’iscritore Bruno Tognolini. Su programma est istadu presentadu chenàbura su 14 de cabunanni in Casteddu dae Manuela Fiori, una de is organizadoras, in un’atopu in ue at partetzipadu, tra is àteros, peri s’assessora regionale de su Turismu Barbara Argiolas. Pro su 22 de cabudanni, a is 8 de merie, in sa sede de s’assòtziu culturale MayMask, in Casteddu, est istada organizada s’anteprima de su fèstival, riservada a is adultos. In custa ocasione s’at a tènnere un’incontru cun Andrea Pomella, autore de su libru “L’uomo che treme”, publicadu dae Einaudi e in libreria dae su 16 cabudanni, chi at a èssere intervistadu dae Francesco Musolino. S’apuntamentu est istadu promòvidu in collaboratzione cun su prèmiu Giuseppe Dessì e cun su fèstival Marinat Cafe’ Noir. Su fèstival at a incumentzare ufitzialmente su 4 de mese de ladàmine cun eventos in su sinnu de sa narratzione, de s’arte, de sa poesia, de sa dantza, de sa mùsica de sa sièntzia.
“Su tema de is disìgios – at ispiegadu Manuela Fiori – est istadu seberadu pro fàghere allargare sa mirada de is pipios e de is piseddos prus addae de is disìgios materiales. Pensamus chi is libros, is narratziones e is istòrias potzant donare unu contributu mannu in custu sensu”. S’assessora Argiolas at ammentadu chi “in custos ùrtimos 13 annos, su fèstival Tuttestorie, frutu de cumpetèntzias e de passione, at tentu sa capatzidade de si rinnovare”. Sa manifestatzione tenet su suportu de sa Regione, de sa Fondazione Sardegna, de is 21 comunas chi aderint, de is sistemas bibliotecàrios Bibliomedia, Sbis, Sarcidano-Barbàgia de Seulu e de àteros vàrios sponsor privados. Su programma prus detalliadu de totu sa manifestatzione, cun oràrios, logos e apuntamentos, si podet compudare consultende su situ http://www.tuttestorie.it.

download

Annunci