Tenent tra 14 e 25 annos, no istùdiant e mancu traballant. Non tenent amigos e colant su bonu de sa die inserrados in s’aposentu issoro. A pisi allegant cun is genitores e parentes. A de die sunt corcados e a note sunt ischidos, pro more de non tratare cun nemos.
S’ùnicu raportu chi poderant cun su mundu est pro mèdiu de is retzas sotziales, chi impreant cun profilos farsos pro more chi nisciunu potzat ischire chie sunt in berteru. Ddos tzèrriant hikikomori, faeddu giaponesu chi bolet nàrrere “abarrare a banda” e difatis custos pitzocos colant parte de sa vida issoro a un’ala de sa sotziedade aorados pro voluntade issoro comente pegos malàidos.
In su Paisu in ue naschet su sole, is aorados sunt giai unu milione, ma non faghet a ddu cunsidereare comente a unu fenòmenu limitadu a su Giapone ebbia.
“Est unu male chi corpit totu is economias isvilupadas– ispiegat Marco Crepaldi, fundadore de Hikikomori Italia, su primu assòtziu natzionale de informatzione e agiudu a pitzu de su tema– Pro is levas noas de is annos Duamìgia, su reolu de resessire a si afirmare in sa sotziedade est unu pesu malu a aliare: ddoe tenet chie nche dda faghet a bagiulare sa cumpetitzione in s’iscola e in su traballu, ma ddoe tenet finas chie non poderat e si lassat andare, inserrende·si in issu etotu”.
Pro s’Itàlia, is ùrtimas istimas allegant de unos 100 mìgia casos de hikikomori, unu tàgiu mannu de persones chi pedint agitòriu. Si tratat de unu nùmeru chi est destinadu a crèschere si non s’at a fàghere a manera de donare a su fenòmenu una collocatzione clìnica e sotziale, difatis, pro s’ora, custu cumportamentu no est istadu galu istudiadu e non si connoschet bene bene.
Assòtzios che a Hikikomori Italia sunt faghende su chi podent pro sensibilizare s’opinione pùbblica a pitzu de custu istùrbu chi a s’ispissu benit iscambiadu comente malagana o mandronia giovanile. A donare coddu a custu echivocu est istada finas sa polìtica chi at alimentadu s’isteriòtipu de is “bambociones”, definitzione imbentada in su 2007 dae su ministru de s’Economia de tando, Tommaso Padoa-Schioppa, pro no allegare de s’espressione “choosy” (crisosos) istabacada dae su ministru de su Traballu, Elsa Fornero, finas a arribbare a s’acrònimu impreadu meda dae is giornalistas Neet, is pitzocos “sena istùdiu e sena traballu”, chi segundu una chirca de s’Universidade Cattolica de su 2017 diant a dèpere èssere belle 2 miliones in totu s’Itàlia.
Dae su puntu de vista mèdicu puru s’hikikomori non tenet una classificatzione crara. In su manuale diagnòsticu e istatìsticu de is disturbos mentales (DSM), sa “Bìbbia” de sa psichiatria, est galu assentadu comente “sìndrome culturale giaponesa”: un’impretzisione chi portat a sutastimare su disàgiu in is àteras partes de su mundu e chi càusat cunseguèntzias perigulosas meda.
“A s’ispissu benit cunfùndidu cun sìndromes depressivas e in is casos prus malos a su pitzocu chi nde sufrit ddi  ponent s’eticheta de “dipendente dae ìnternet” – ispiegat Crepaldi – Una diàgnosi che a custa de sòlitu portat a s’istesiamentu fortzadu dae ogna dispositivu eletrònicu, isculleghende·ddu dae ogna mèdiu de comunicatzione cun su mundu esternu pro su malàidu; una cundenna pro su hikikomori”.
Comente si torrat hikikomori?
S’ambiente iscolàsticu est su logu in ue is hikikomori sufrint de prus, e su calis su prus de issos cumentzat a s’isolare dae su mundu pròpiu durante is annos de s’iscola mèdia e de is superiores. Est in custu perìudu difatis chi a s’ispissu si presentat su gosi naradu “fatore pretzipitante”, est a nàrrere s’eventu chi a bellu a bellu càusat s’istesiamentu dae is familiares e dae is amigos. Podet èssere unu fatu de bullismu o unu votu malu in iscola.
“Un’acontessimentu de pagu contu pro is agenos, ma chi si benit castiadu in intro de unu cuadru psicològicu dìligu e sena difesas, tando pigat un’importàntzia manna– ispiegat Crepaldi – Est sa prima fase de s’hikikomori: su pitzocu cumentzat a mancare a iscola chirchende iscusas de ogna genia, lassat totu is atividades isportivas, pigat sa note pro die e sa die pro note e passat ora meda pompiende sa televisione e cun is vìdeogiogos”.
Est pretzisu a intervènnere pròpiu in custu primu momentu de su disturbu, cando si presentant is primos singiales. In custa fase is genitores e is insegnantes tenent unu ruolu fundamentale de preventzione: depent investigare bene pro cumprèndere is motivos de su malistare e, si serbit, chircare s’agiudu de unu professionista a manera chi su disàgiu non colet a una fase prus crìtica, chi pro dda curare diat a bòllere un’interventu prus longu, peri de annos.
Non podimus negare ca sa cultura giaponesa siat caraterizada istoricamente dae unos cantos fatores chi aumentant sa mannària de su fenòmenu, a su puntu chi si podet giai chistionare de duas generatziones de hikikomori, sa de immoe e sa de in is annos Otanta. Su sistema sotziale e iscolàsticu cumpetitivu meda e su ruolu de sa figura paterna, medas bias ausente pro more de is oràrios istragosos de traballu, sunt sa càusa de aspetativas angustiosas, a bortas malas a s’acumprire. Peri si cun calicuna diferèntzia, in Itàlia puru is pressiones sotziales sunt graes meda. Is primos casos hikikomori sunt istados diagnosticados in su 2007 e segundu is espertos dipendent meda dae s’abasciamentu de is nàschidas e dae s’aumentu cunsighente de is fìgios solos, chi a s’ispissu sunt prus sugetos a bìvere suta pressione. Sa crisi econòmica, s’intrada tardiva de is giòvanos in su mundu de su traballu e s’ispainamentu de sa cultura de s’immàgine, suportada dae is mèdios de comunicatzione sotziale, ant contribuidu a aumentare su fenòmenu.
In Itàlia sa sìndrome non corpit is òmines ebbia, comente costumat a capitare in Giapone, ma interessat peri is fèminas, cun unu raportu de 70 a 30. “Pro una chistione culturale is famìlias cunsiderant s’assolamentu de una fìgia comente a unu problema prus minore – ispiegat Crepaldi – Fortzis pro ite, cun s’idea chi unu incras s’at a cojubare e nd’at a essire de domo, bient is custu cumportamentu un’antitzipatzione de sa bona massaja e de sa bona pubidda.
In Itàlia ddoe tenet diferèntzias peri tra una regione e s’àtera: is hikikomori de su Nord tenent caraterìtsicas diversas de is de su Sud. Pròpiu pro custu su giassu ìnternet de Hikikomori Italia ponet a disponimentu servìtzios de cunversatzione regionales in ue is pitzocos podent allegare de is problemas chi tenent cun àteros pitzocos de sa regione issoro chi tenent su matessi disturbu.
Custas chat tenent una règula ebbia: chie ddoe imbucat no est obligadu a interagire, ma si depent presentare ebbia. Chie non rispetat custa règula benit “bannadu”. Pro chie bolet contare s’istoria sua ddoe tenet finas unu Forum, abertu siat a is pitzocos, siat a is genitores: est unu logu parallelu in ue essint a campu totu is suferèntzias e is dificultades de persones bisongiosas chi in su mundu reale non diat a tènnere nen sa fortza, nen su coràgiu de pedire agiudu.
Su Forum no est un’impriastu virtuale ebbia, pro ite gràtzias a s’impinnu de chie ddoe traballat e de chie ddu gestit, in custos annos est istadu possìbile finas agiudare medas giòvanos in dificultade, ognunu cun un’istòria diferente. Comente a s’istòria de Luca, 25 annos:
“Sa die e sa note fiant uguales, papaia e mi dormia cando nde tenia gana. Aia lassadu totu is amigos e pensaia a su computer ebbia. S’ischermo de su PC pro a mie fiat un’ispètzia de stargate, unu giassu pro intrare in un’àteru universu. Non mi nd’abigiaia de su tempus chi colaiat e fia a totu die cun is pòddighes pitzigados a sa tastiera… No nche dda faghia a ismìtere. Cando mi devia samunare mi nche iscudia in sa dòtzia a sa lestra pro pòdere torrare a giogare in deretura. Non nde podia fàghere a mancu. Fiat una droga.
Custu manìgiu est duradu duos annos, duos annos de sa vida mia fuliados gioghende a World of Warcraft, unu videogiogu de istrategia in isolamentu cumpletu. A sa coa non nche dda faghia nimancu a mi poderare a camba e a caminare, a fortza de abarrare sètzidu in sa cadira.
Totu custu est sutzèdidu sena chi mama mia si nd’acataret: dae is 8 de mangianu a is 5 de merie issa traballaiat e deo imbetzes de andare a iscola m’abbarraia in domo. Non ddoe bolia torrare prus e cando capitaiat de ddoe andare non mi ddoe agataia bene, fiat unu turmentu. Totus mi donaiant fasciugu, non podia padire prus a nemos. Cando fia solu imbetzes istaia bene, s’isolamentu fiat s’ùnica cura chi m’allebiaiat sa mente, ma non fiat una cura, fiat una maladia. Posca nche dd’apo acabbada a non m’atzere deo etotu, non suportaia prus su chie fia.
Però, gratzias a chie m’at agiudadu nche dd’apo fata a nde essire dae cussa canangiada: immoe tèngio una vida sotziale e un’isposa bella e istimosa. Pensende a su chi fia torradu no isco si fia unu hikikomori! No dd’isco, ma su chi isco est ca pro bìnchere a cussu dimòniu sa fortza nde dda depimos bogare dae intro nois etotu, si nois non bolimus èssere agiudados, peri si s’incaressat calicuna ànima bona, est belle impòssibile a si sarbare. Ogna situatzione est diversa dae s’àtera e fortzis no esistit unu rimèdiu ebbia, ma s’ùnicu cunsìgiu chi potzo donare est cussu de iscabulare su computer, pro ite cussa sensatzione de paghe e de cunfortu chi donat, in beridade est unu velenu.
Bogadu dae
https://larep.it/2PtQgfH

hikikomori

Annunci