Pubblicamus una poesia iscrita dae su poeta artazensu Fisente Cogodda pro S’Ischiglia,  sa rivista de poesia, literatura e arte de Sardigna fundada dae sa bonànima de Anzeleddu Dettori.

A R Z A N A
de VINCENZO COGODDA

In amenas contradas solianas
Arzana est piantada in d’una costa;
fantastica s’istrada a gira osta,
aera bona e-i sas abbas sanas.

E cando sonan forte sas campanas
han da’ s’atera parte sa risposta.
Pro incantare mandadas apposta
da-e su chelu paren sas bajanas!

Sa zente est ospitale e vivet bene
hat binu bonu e fruttas saboridas
chi sos chi no bi passant no lu crene

Sas campagnas de gala sun bestidas.
Oh! faghet piaghere in cussu Edene
cun gioja a bi passare milli vidas!

0001.jpg

Annunci