Est nàschida in Tortolì- Arbatassa sa setzione de s’Assòtziu Natzionale Marineris de Itàlia. (in italianu “Associazione Nazionale Marinai d’Italia”). S’assòtziu s’est costituidu a manera formale cun atu de sa presidèntzia natzionale su 21 de maju coladu. Sa truma, de estratzione de sa Marina Militare, bòfìda meda dae is sòtzios fundadores, in is dies coladas est andada a fàghere bìsita a is amministradores e a su Sìndigu de su comunu de Tortolì, pro presentare s’assòtziu a is cunsigeris is valores suos e pro regalare a su primu tzitadinu una targa de arregordu.
Is punnas de s’assòtziu ant a èssere: collaborare cun sa marina militare, promòvere s’arruolamentu de is giòvanos e poderare bia sa memòria de is chi ant sacrificadu sa vida issoro, amparare su setore ambientale, promòvere sa cultura e is atividades de su mare. Su presidente est Giuseppe Caria, su vitze Tonino Monni e consigeri Sergio Politi.
Su sìndigu a nòmene de s’amministratzione at torradu gràtzias a sa truma pro s’initziativa bella e de importu chi s’agiungit a is àteras assotziatziones presentes in Tortolì.

download

Annunci